वाल्हे प्रतिनिधी : सिकंदर नदाफ
सामाजिक सलोखा, बंधुभाव आणि आपुलकी जपणे हीच खरी काळाची गरज आहे. पुरंदर हवेलीतील मुस्लिम बांधवांना दीपावली निमित्त फराळ वाटप करून ग्रामीण संस्थेच्या अध्यक्षा राजवर्धिनी संजय जगताप यांनी सामाजिक ऐक्याचा एक उत्तम आदर्श घालून दिला आहे. या संस्थेचे सामाजिक कार्य अत्यंत कौतुकास्पद आणि प्रेरणादायी आहे, असे गौरवशाली उद्गार ज्येष्ठ विधीतज्ञ विजय भालेराव यांनी काढले.
वाल्हे ( ता. पुरंदर ) येथे ग्रामीण संस्थेच्या वतीने मुस्लिम बांधवांना दिवाळीच्या फराळाचे वाटप करण्यात आले, यावेळी आयोजित कार्यक्रमात ते बोलत होते.
विजय भालेराव पुढे म्हणाले की, "सण आणि उत्सव हे आनंद वाटण्यासाठी असतात. जात, धर्म आणि पंथाच्या भिंती ओलांडून जेव्हा आपण एकमेकांच्या आनंदात सहभागी होतो, तेव्हाच खऱ्या अर्थाने समाज सशक्त होतो. ग्रामीण संस्थेच्या अशा उपक्रमांमुळे आपापसातील प्रेम आणि विश्वास अधिक दृढ होतो."
या प्रसंगी वाल्हे गावचे उपसरपंच सागर भुजबळ सामाजिक कार्यकर्ते नाना दाते आरपीआयचे शाखाध्यक्ष शैलेंद्र भोसले यांसह चांदभाई शेख मौलाना मोहम्मद सोहेल अख्तर राजू इनामदार अमोल भुजबळ अजय कुदळे कुणाल भुजबळ शौकत शेख असलम नदाफ आदी मान्यवर मोठ्या संख्येने उपस्थित होते. तर फराळ वाटपाच्या या स्तुत्य उपक्रमाबद्दल मुस्लिम बांधवांच्या वतीने मोबीन बागवान यांनी ग्रामीण संस्थेचे आणि आयोजकांचे मनःपूर्वक आभार मानले.
टिप्पण्या