इंदापुरात गुटख्याचा 'दिवाळी धमाका': एफडीए झोपेत, पोलिसांचे 'लाडके पंटर' थेट ठाण्यातच तैनात; रस्त्यांवर मात्र रंगीबेरंगी 'चित्रकला'!

इंदापूर: इंदापूर तालुक्यात सध्या एका नव्याच कलेला उधाण आलं आहे! शहर असो वा ग्रामीण भाग, रस्त्या-रस्त्यावर, भिंतींवर आणि चौकाचौकांत तांबड्या-लाल रंगाच्या अशा काही 'पिचकाऱ्या' मारल्या जात आहेत की, परदेशी चित्रकारही ही रंगीबेरंगी 'आर्ट' पाहून चक्रावून जातील! अपवादात्मक दोन-चार कोपरे सोडले, तर संपूर्ण तालुक्यात गुटख्याची विक्री अगदी खुलेआम, दिमाखात आणि ढोल-ताशांच्या गजरासारखी सुरू आहे. पण, समाजसुधारणेच्या आणि धडक कारवाईच्या बाता मारणारे एफडीए खाते (आणि त्यांचे प्रमुख तुकाराम मुंढे साहेब) नेमके कुठल्या गाढ झोपेत आहेत, असा संतप्त प्रश्न आता नागरिक विचारत आहेत.

‘गोतामे’ फुल्ल अन् दिवाळी धमाका! सध्या सण-उत्सवाचे दिवस नसले तरी इंदापुरातील गुटखा माफियांसाठी रोजच 'दिवाळी धमाका' सुरू आहे. गुटख्याचे गोडाऊन म्हणजेच 'गोतामे' काठोकाठ भरून वाहत आहेत. सरकारबंदीचा कागदी वाघ दाखवला जातोय, पण प्रत्यक्षात मात्र "खिशाला द्या मलिदा, अन् गुटखा न्या फायदा" असाच काहीसा कारभार सुरू आहे.

पोलीस अन् 'पंटर': हे नातं काय म्हणायचं? सर्वात रंजक आणि चकीत करणारी गोष्ट म्हणजे इंदापुरात गुटखा विकणारे प्रमुख व्यापारी आणि त्यांचे चमचे (पंटर) नेहमीच पोलीस ठाण्याच्या आवारात रेंगाळताना दिसतात. साध्या माणसाला तक्रार द्यायला गेलो तरी शंभर प्रश्न विचारले जातात, पण या 'गुटखा पंटरांना' मात्र पोलीस ठाण्यात इतका हक्काचा प्रवेश असतो, की ते तिथले दलाल आहेत की काय, असा संशय यावा! "आम्ही पोलिसांचे जवळचे," असा रुबाब दाखवत हे पंटर शहरात उजळ माथ्याने गुटख्याची साखळी चालवत आहेत.

आता 'त्या' पिचकाऱ्या बंद कधी होणार? गुटखा खाणारे महाभाग कुठेही तोंडातला पिचकारा मारतात. सरकारी इमारती, सार्वजनिक चौक आणि स्वच्छ रस्ते यांच्यावर या 'तांबड्या क्रांती'चे डाग उठले आहेत. सर्वत्र घाणीचे साम्राज्य पसरले असून स्वच्छतेच्या नावाने पूज्य बाबाजीचा भोपळा उरला आहे.

कारवाया पुरत्या थंडावल्या आहेत. एफडीएची पथके इंदापूरच्या वेशीवर कधी पाऊल ठेवणार? की एफडीएचे अधिकारी आणि स्थानिक प्रशासन फक्त हप्ते आणि 'सेटिंग'चे कागद रंगवण्यातच व्यस्त राहणार?

नागरिकांचा एकच सवाल: इंदापूरकरांना आता या प्रशासकीय ढोंगाचा पुरता विट आला आहे. एफडीए आणि पोलीस खाते खरोखरच जागे होऊन या दलालांवर धडक कारवाई करणार, की इंदापूरच्या रस्त्यांवर अशीच रंगीत पिचकाऱ्यांची 'कलाप्रदर्शने' नित्यनेमाने पाहायला मिळणार? एफडीए प्रमुख तुकाराम मुंढे साहेब, आता तरी या 'निद्रिस्त' खात्याला जरा जणझणीत डोस पाजा!