सासरच्या जाचाला कंटाळून विवाहितेची आत्महत्या; पतीसह तिघांविरुद्ध गुन्हा दाखल

इंदापूर (पुणे ग्रामीण):

[असिफभाई शेख यांचेकडन ] इंदापूर तालुक्यातील वरकुटे बुद्रुक येथे सासरच्या छळाला कंटाळून एका १९ वर्षीय विवाहितेने गळफास लावून आत्महत्या केल्याची धक्कादायक घटना घडली आहे. या प्रकरणी इंदापूर पोलिसांनी पती, दीर आणि सासू अशा तिघांविरुद्ध भारतीय न्याय संहितेच्या विविध कलमान्वये गुन्हा दाखल केला आहे.

मिळालेल्या माहितीनुसार, शिवानी विकास शिंदे (वय १९ वर्षे ७ महिने) असे मृत विवाहितेचे नाव आहे. शिवानीचा विवाह मे २०२५ मध्ये वरकुटे बुद्रुक येथील विकास अजिनाथ शिंदे याच्याशी झाला होता. लग्नानंतर सुरुवातीचे काही महिने सर्व काही सुरळीत होते. मात्र, त्यानंतर पती विकास, दीर प्रकाश आणि सासू सुरेखा शिंदे यांनी शिवानीच्या चारित्र्यावर संशय घेण्यास सुरुवात केली.फिर्यादीत नमूद केल्यानुसार, आरोपी तिला नेहमी फोनवर कोणाशी बोलते, यावरून टोचून बोलत असत. तसेच, वॉटर फिल्टर प्लांट टाकण्यासाठी माहेरून २ लाख रुपये घेऊन ये, अशी मागणी करत तिचा शारीरिक आणि मानसिक छळ केला जात होता. या जाचाला कंटाळून शिवानीने सोमवार, २७ एप्रिल २०२६ रोजी दुपारी सव्वा दोनच्या सुमारास राहत्या घरी गळफास घेऊन आपले जीवन संपवले.

या प्रकरणी मृत शिवानीची आई दीपाली रामचंद्र जामदार (वय ३६, रा. बेलवाडी, ता. इंदापूर) यांनी इंदापूर पोलीस ठाण्यात फिर्याद दिली आहे. त्यांच्या फिर्यादीवरून पोलिसांनी खालील आरोपींविरुद्ध गुन्हा दाखल केला आहे:

१. विकास अजिनाथ शिंदे(पती)

२. प्रकाश अजिनाथ शिंदे (दीर)

३. सुरेखा अजिनाथ शिंदे (सासू)

पोलिसांनी या घटनेची नोंद FIR No. 0251/2026 अन्वये केली असून, आरोपींवर भारतीय न्याय संहिता (BNS) २०२३ च्या कलम १०८ (आत्महत्येस प्रवृत्त करणे), ८५ (क्रूरता) आणि ३(५) नुसार गुन्हे दाखल करण्यात आले आहेत.या प्रकरणाचा पुढील तपास पोलीस उपनिरीक्षक अजित पुंडलिकराव बिरादार करत आहेत.