रोजगार सेवकांच्या संपाबाबत सरकारने तोडगा न काढल्यास २५ मे रोजी तहसील कार्यालयासमोर लाक्षणिक उपोषण; 'आपली नाती, आपली माणसं, आपला परिवार' संघटनेचा इशारा

इंदापूर

तालुक्यातील रोजगार सेवकांनी आपल्या प्रलंबित मागण्यांसाठी पुकारलेल्या काम बंद संपाला दीड महिन्यापेक्षा अधिक काळ उलटून गेला आहे. मात्र, राज्य सरकारने या संपाबाबत अद्यापही कोणतीही सकारात्मक भूमिका न घेता कमालीचे दुर्लक्ष केले आहे. परिणामी, तालुक्यातील रोजगार हमी योजना (रोहयो) विभागांतर्गत चालणाऱ्या विविध योजनांची कामे पूर्णपणे ठप्प झाली असून, हातावर पोट असणाऱ्या गरीब मजुरांवर मजुरीअभावी उपासमारीची वेळ आली आहे.

या गंभीर परिस्थितीची दखल घेत, आपली नाती, आपली माणसं. आपला परिवार ग्रुप, इंदापूर तालुका'या सामाजिक संघटनेच्या वतीने येत्या **सोमवारी, दिनांक २५ मे २०२६ रोजी सकाळी ११ ते सायंकाळी ५ या कार्यालयीन वेळेत इंदापूर तहसील कार्यालयासमोर एकदिवसीय लाक्षणिक उपोषण** करण्याचा इशारा देण्यात आला आहे.

या संदर्भात संघटनेच्या वतीने मंगळवारी (दि. १९ मे) इंदापूरचे तहसीलदार मा. श्री. जीवन बनसोडे साहेब आणि इंदापूर पंचायत समितीचे गटविकास अधिकारी मा. श्री. सचिन खुडे साहेब यांच्यामार्फत पुणे जिल्हाधिकारी व पुणे जिल्हा परिषद मुख्य कार्यकारी अधिकारी यांना निवेदन सादर करण्यात आले.

तसेच या निवेदनाच्या प्रती रोजगार हमी योजना व फलोत्पादन मंत्री मा. श्री. भरत गोगावले साहेब आणि इंदापूर तालुक्याचे आमदार तथा कृषी मंत्री मा. श्री. दत्ता मामा भरणे यांना पोस्टाद्वारे पाठवून तातडीने लक्ष घालण्याची विनंती करण्यात आली आहे.

राज्य सरकारने रोजगार सेवकांचा संप तात्काळ मिटवून योजना पूर्ववत कराव्यात आणि मजुरांना हक्काचा रोजगार उपलब्ध करून द्यावा, या प्रमुख मागणीसाठी हे आंदोलन होणार आहे. हे उपोषण पूर्णपणे शांततापूर्ण व लोकशाही मार्गाने केले जाणार असून, कायदा व सुव्यवस्थेचा कोणताही भंग होणार नाही तसेच पोलीस प्रशासनाने दिलेल्या सर्व सूचनांचे तंतोतंत पालन केले जाईल, अशी हमी आंदोलकांनी दिली आहे.या लाक्षणिक उपोषणात 'आपली नाती, आपली माणसं. आपला परिवार' सामाजिक संघटनेचे प्रमुख पदाधिकारी सहभागी होणार आहेत, ज्यामध्ये:

आयु. महादेव लोंढे,श्री. बाळासाहेब डफळ (वृक्षप्रेमी, बोरी,सौ. राजश्री (ताई) पवार (रेडा),सौ. धनश्री (ताई) धालपे (बोरी)सौ. सुनीता (ताई) घोगरे (शेटफळ हवेली)सौ. नुतन (ताई) डफळ (बोरी)सौ. वर्षा (ताई) मारकड (न्हावी)सौ. प्रियांका (ताई) पांढरे (गलांडवाडी नं. १)सौ. प्रतिभा (ताई) काळे (बोरी) आता ग्रामीण भागातील या ज्वलंत प्रश्नावर आणि मजुरांच्या उपासमारीवर राज्य सरकार कधी आणि काय निर्णय घेणार, याकडे संपूर्ण इंदापूर तालुक्याचे लक्ष लागले आहे.