इंदापूर ते पुणे एसटीचा ‘ढाबा’ प्रवास: प्रवाशांच्या खिशाला कात्री, एसटी प्रशासनाचे मात्र ‘अर्थपूर्ण’ दुर्लक्ष!

इंदापूर (विशेष बातमी प्रतिनिधी)

इंदापूर ते पुणे प्रवासादरम्यान एसटी महामंडळाच्या बस आता अधिकृत बसथांब्यांवर न थांबता चक्क 'बेकायदेशीर' हॉटेल आणि ढाब्यांवर थांबवण्याचा सपाटा सुरू आहे. प्रवाशांच्या सोयीसाठी धावणारी एसटी आता चहा-पाणी आणि जेवणाच्या नावाखाली प्रवाशांच्या खिशाला कात्री लावत असून, यामागे काहीतरी 'दाल में काला' असल्याची चर्चा प्रवाशांमधून रंगली आहे.

अधिकृत बोर्डाचे नाटक कशासाठी?

 एका बाजूला अधिकृत बसथांब्याचे फलक लावून तिथेच गाड्या थांबवण्याचा दिखावा केला जातो, तर दुसरीकडे मात्र बस थेट हॉटेलच्या पार्किंगमध्ये वळवली जाते. हे कशाचे द्योतक आहे?

परवानगीचा घोळ काय?

या खासगी हॉटेल आणि ढाब्यांना एसटी बसेस थांबवण्याची अधिकृत परवानगी कोणत्या अटींवर देण्यात आली आहे?

गाड्यांची मर्यादा किती? संबंधित ढाब्यावर दिवसाला नेमक्या किती बसेस थांबवण्याची परवानगी देण्यात आली आहे?

दरपत्रकाचे काय झाले? परवानगी देताना हॉटेल किंवा ढाबा चालकांना एसटी प्रशासनाने कोणतेही दरपत्रक (Rate Card) दिले होते का? 

एफडीए (FDA) सुस्त, हॉटेल चालक मालामाल!

सध्या उन्हाळ्याचे दिवस असल्याने प्रवाशांची संख्या मोठ्या प्रमाणावर वाढली आहे. अशा गर्दीच्या वातावरणात प्रवाशांना पिण्याच्या पाण्यापासून ते खाण्याच्या पदार्थांपर्यंत प्रत्येक गोष्टीसाठी दुप्पट ते तिप्पट दर मोजावे लागत आहेत. एका पाण्याच्या बाटलीवर किंवा चहाच्या कपावर एमआरपीपेक्षा अधिक दर आकारून ढाबा चालक कोट्यवधींची माया गोळा करत आहेत. 

विशेष म्हणजे, या संपूर्ण प्रकारावर अन्न व औषध प्रशासन (FDA) मात्र पूर्णपणे सुस्त बसले असून, प्रवाशांच्या आरोग्याशी आणि खिशाशी होणाऱ्या या खेळाकडे दुर्लक्ष करत आहे.

प्रवाशांचा सवाल: बस सोयीसाठी की गैरसोयीसाठी ?

"एसटी महामंडळ हे सर्वसामान्य प्रवाशांच्या सोयीसाठी आहे की हॉटेल चालकांची तिजोरी भरण्यासाठी? एसटी प्रशासनाने तात्काळ या बेकायदेशीर थांब्यांवर कारवाई करून अधिकृत थांब्यांवरच बसेस थांबवाव्यात. -संतप्त प्रवासी

प्रवाशांचा हा संताप पाहता, एसटी महामंडळ यावर काय कारवाई करते, हे पाहणे महत्त्वाचे ठरणार आहे.

 अनधिकृत ढाब्यांवर एसटी थांबणे. प्रवाशांची आर्थिक लूट व अवाजवी वेळ वाया जाणे. तात्काळ कारवाई करून अधिकृत थांबे पूर्ववत सुरू करावेत.