*शिवाजीनगर, इंदापूर येथील सागर गोविंद पिसे यांची महाराष्ट्र शासनाच्या सहाय्यक अभियंता पदी निवड.*

इंदापूर:-

IBPS द्वारे घेतल्या जाणाऱ्या सहाय्यक अभियंता महापारेषण (ऊर्जा विभाग) पदासाठीच्या परीक्षेचा निकाल नुकताच जाहीर झाला आहे. डिसेंबर महिन्याच्या शेवटी या परीक्षा घेण्यात आल्या होत्या व रविवार दिनांक 23 फेब्रुवारी रोजी याचा निकाल जाहीर झाला. यामध्ये शिवाजीनगर इंदापूर येथील सागर गोविंद पिसे यांनी बाजी मारली आहे. 

अगदी गरीब कुटुंबामध्ये जन्मलेल्या सागर गोविंद पिसे यांचे प्राथमिक शिक्षण बेडशिंगे तर विद्यालयीन शिक्षण श्री हनुमान विद्यालय अवसरी तसेच शंभू महादेव विद्यालय दगडवाडी या ठिकाणी झाले असून, कनिष्ठ महाविद्यालयीन शिक्षण वर्धमान महाविद्यालय वालचंदनगर येथे पूर्ण करून पुढे इलेक्ट्रिकल इंजिनिअरिंग ही पदवी इंदापूर येथील एस बी पाटील कॉलेज ऑफ इंजीनियरिंग येथून प्राप्त केली.

आई-वडील गोविंद पिसे आणि अनिता पिसे यांनी मोलमजुरी करून आपल्या मुलांना शिकवले. पदवीनंतरच्या शिक्षणानंतर सागर याने पुणे येथे अभ्यास करत स्वतःचा खर्च भागवण्यासाठी Zomato पार्सल बॉय म्हणून काम केले. दिवसभर अभ्यासिकेमध्ये अभ्यास करून नंतर झोमॅटो चे पार्सल पुरवण्याचे काम सागर करत असे. निकाल जाहीर झाला त्या दिवशी भारत आणि पाकिस्तान यांच्यामध्ये चॅम्पियन ट्रॉफीसाठीची क्रिकेट मॅच असल्यामुळे त्या दिवशी मॅच पाहण्यासाठी त्याने सुट्टी घेतली होती. या मॅचमध्ये भारतीय संघाने पाकिस्तान संघाला हरवून विजय प्राप्त केला व त्याच वेळी रात्री साडेदहा वाजता सागरचा मित्र धावत त्याच्या रूमवर आला आणि म्हणाला सागर सर तुम्ही साहेब झाला आणि लागलेला निकाल दाखवला. यावेळी मात्र सागरने ही त्याच्या आतापर्यंतच्या अपयशांना हरवून विजय प्राप्त केला होता आणि नकळत डोळ्यातून आनंदाश्रू वाहू लागले. प्रतिकूल परिस्थितीची जाणीव, कसलेही आर्थिक पाठबळ नसताना घेतलेले कष्ट, जिद्द व चिकाटीच्या जोरावर रात्रंदिवस केलेला अभ्यास यामुळे सागर इथपर्यंत पोहचला आहे. गरिबी आणि प्रतिकूल परिस्थितींचा सामना करत हे यश प्राप्त केल्यामुळे सागरचे सर्वत्र कौतुक होत आहे.