*हर्षवर्धन पाटील यांना सागर बंगल्यावर बुधवारी बोलविल्याची चर्चा - देवेंद्र फडणवीस हर्षवर्धन पाटील यांना कोणता शब्द देणार ?*

  इंदापूर:- बारामती लोकसभा मतदारसंघात महायुती व महाविकास आघाडीमध्ये निवडणूक जिंकण्यासाठी सुरु झालेली काटे की टक्कर लक्षात घेता, राज्यातील महायुतीचे जेष्ठ नेते या मतदारसंघाकडे विशेष लक्ष देत आहेत. या मतदारसंघांमध्ये लोकसभेच्या गेल्या 4 ही निवडणुकांमध्ये निर्णायक भूमिका बजावणारे माजी मंत्री व भाजपचे जेष्ठ नेते हर्षवर्धन पाटील यांना उपमुख्यमंत्री देवेंद्रजी फडणवीस यांनी सागर बंगल्यावर बुधवारी दि.20 चर्चेसाठी बोलविल्याची चर्चा इंदापूर तालुक्यात व मतदारसंघांमध्ये सध्या सुरू आहे. या चर्चेत देवेंद्र फडणवीस हे माजी मंत्री हर्षवर्धन पाटील यांना इंदापूर विधानसभे संदर्भात कोणता शब्द देतात याकडे राजकीय निरीक्षकांचे लक्ष लागून राहिले आहे.

               भाजपचे जेष्ठ हर्षवर्धन पाटील हे राज्याच्या राजकारणामध्ये संयमी नेते म्हणून ओळखले जातात. बारामती लोकसभेच्या सन 2004, 2009, 2014, 2019 या चारही निवडणुकांमध्ये हर्षवर्धन पाटील यांनी दिलेल्या शब्दाप्रमाणे प्रामाणिकपणे व निष्ठेने काम करीत किंगमेकर ची भूमिका बजावली. मात्र नंतर झालेल्या 4 ही वेळा झालेल्या इंदापूर विधानसभा मतदार संघाच्या निवडणुकीत दिलेला शब्द पाळला गेला नाही याची खंत त्यांना व त्यांच्या कार्यकर्त्यांना आहे. सलग 4 वेळा इंदापूर विधानसभेला फसविण्यात आल्याने बारामती लोकसभा मतदारसंघात हर्षवर्धन पाटील यांच्या कार्यकर्त्यांमध्ये असलेली तीव्र नाराजी मुंबई-दिल्ली पर्यंत प्रसार माध्यमांद्वारे पोहचलेली आहे.

             देशातील सर्वात हाय व्होल्टेज लढत बारामतीत लोकसभा मतदार संघात होत असल्याने, महायुती व महाविकास आघाडीचे नेते मतदारसंघांमध्ये सूक्ष्म नियोजन करीत, कोठेही कमी पडणार नाही याची दक्षता घेत आहेत. या लोकसभा मतदारसंघात हर्षवर्धन पाटील यांची भूमिका निर्णय ठरणार असल्याचे राजकीय निरीक्षकांना वाटत आहे. या पार्श्वभूमीवरती राज्याचे उपमुख्यमंत्री देवेंद्र फडणवीस यांच्याशी  भाजपचे नेते हर्षवर्धन पाटील यांच्या होणाऱ्या चर्चेकडे राज्यातील राजकीय निरीक्षकांचे लक्ष लागून राहिले.

-------------------------------------------