*उपमुख्यमंत्री अजित पवार यांच्या हस्ते इंदापूर तालुक्यात विविध विकासकामांचे भूमिपूजन*

पुणे, दि. २३: उपमुख्यमंत्री अजित पवार यांच्या हस्ते इंदापूर तालुक्यातील विविध विकास कामांचे भूमिपूजन करण्यात आले. 

यावेळी खासदार सुनील तटकरे, आमदार दत्तात्रय भरणे, संजय शिंदे, उप विभागीय अधिकारी वैभव नावडकर, उप विभागीय पोलीस अधिकारी डॉ. सुदर्शन राठोड, तहसीलदार जीवन बनसोडे, कार्यकारी अभियंता अमोल पवार, गट विकास अधिकारी सचिन खुडे, नगर परिषदेचे मुख्यधिकारी रमेश ढगे,  प्रदीप गारटकर आदी उपस्थित होते. 

श्री. पवार यांच्या हस्ते नगरोत्थान महाअभियानांतर्गत इंदापूर नगर परिषदेच्या हद्दीत बस डेपो ते राज्य महामार्ग क्र.७१, बारामती रस्ता ते क्रीडा संकुल, बारामती रस्ता ते तरंगवाडी, संतोष बामणे यांचे घर ते क्रीडा संकुलापर्यंतचा रस्ता ते बायपासपर्यंत सिमेंट काँक्रीट रस्ता, आरसीसी गटर करणे, खुळे चौक ते मंगेश पाटील पेट्रोल पंप (कॅनल रस्ता) ४ पदरी सिमेंट काँक्रीट रस्ता, आरसीसी गटर, पद रस्त्याचे कामाचे तसेच मल नि:सारण प्रणाली अंतर्गत गावठाण भागातील २२.७८ कि.मी. आणि हद्दवाढ भागातील २९.२४ कि.मी. भूमिगत गटर कामांचे भूमिपूजन करण्यात आले. 

वीरश्री मालोजीराजे भोसले यांची गढी संवर्धन करणे व हजरत चांदशहावलीबाबा दर्गा सुशोभीकरण कामाचेही यावेळी भूमिपूजन करण्यात आले. 

*छत्रपती मालोजीराजे भोसले गढी जीर्णोद्धार कामाचे भूमीपूजन*

छत्रपती मालोजीराजे भोसले यांच्या गढीचा जीर्णोद्धार करण्यात येणार असून अस्तित्वातील जुनी इमारत पाडणे, जागेची साफ सफई करणे, जोत्यासाठी मातीचे खोदकाम करणे, सोलिंग करणे, बुरुजाच्या भिंतीचे दगडी बांधकाम काम करणे, भिंतीच्या आतील बाजूस मातीचा भराव करणे, तंदूर स्टोन फ्लोरिंगचे काम करणे, अस्तित्वातील लाकडी कामास पॉलिश करणे आदी कामे करण्यात येणार आहे. छत्रपती मालोजीराजे भोसले गढी पुनर्विकास, रामवेस ते गढीपर्यंत ऐतिहासिक देखावाही निर्माण करण्यात येणार आहे.

*हजरत चांदशहावलीबाबा दर्गा सुशोभीकरण*

या कामाअंतर्गत छतास गळती प्रतिबंधक उपाय योजना करणे, दर्गाच्या बाहेरील बाजूस प्लास्टर करणे, छतास जीआय शीट बसविणे, दर्गाच्या पाया तसेच रॅम्पला सोलींग करणे, कॉक्रिट बेड करणे, पायऱ्यांचे दगडी बांधकामासह पाँईटिंग करणे, दरगाहच्या आतील बाजुस तंदूर दगड फरशी बसविणे, लोखंडी जाळी बसविणे, दरवाजे बसविणे, खिडक्या बसविणे, खिडक्यांना ग्रील बसविणे, दरग्याच्या बाहेरील बाजूस रंगकाम करणे, फरशीकाम करणे, महिला दरगाहसाठी आर.सी.सी. फ्रेमवर्क करणे, लाकडीकामास मेलॅमाईन पॉलीश करणे आदी कामे करण्यात येणार आहे. 

*शिरसोडी ते कुगांव पुलाचे भूमिपूजन*

इंदापूर शहर ते शिरसोडी रस्ता येथील शिरसोडी ते कुगांव, ता. करमाळा यांना जोडणाऱ्या १ हजार ३८० लांबीच्या उच्चस्तरीय लांब पुलाचे बांधकाम करण्यात येणार आहे. उजनी धरण क्षेत्रात या पुलाचे बांधकाम होणार असून या कामासाठी ३९५ कोटी ९७ लाख ३२ हजार रुपये खर्चास प्रशासकीय मान्यता देण्यात आली आहे. या पुलाचा शिरसोडी ते कुगांव येथील नागरिकांना लाभ होणार असून त्यांचा वेळ व इंधनात बचत होणार आहे.