इंदापूर : केंद्र सरकारने जीएसटी आणि आयकर कायद्यातील जाचक तरतुदी रद्द करून करविषयक तरतुदी सोप्या व सुटसुटीत करण्याची मागणी कर सल्लागार संघटना,इंदापूर आणि इंदापूर व्यापारी संघटने तर्फे करण्यात आली.
देशभरातील कर सल्लागार आणि व्यापारी संघटना यांनी शुक्रवारी(दि.२९) देशव्यापी आंदोलन केले.या अंतर्गत इंदापूर तहसीलदार कार्यालयात शांततेच्या मार्गाने मा.तहसीलदार सोनाली मेटकरी यांना निवेदन देवुन विरोध प्रदर्शन करण्यात आले.
जीएसटी कायद्यात वारंवार होत असलेल्या बदलांमुळे वेळच्यावेळी त्याची माहिती होणे व अंमलबजावणी करणे यात अडचणी निर्माण होत असुन सदर आंदोलन हे सरकार विरोधात नसुन कर कायद्यातील सुधारणांबाबत आहे,
असे कर सल्लागार संघटने तर्फे कर सल्लागार अमोल शहा व मयुर गुजर यांनी सांगितले.अनेक कर सल्लागार, सनदी लेखापाल सदर कर कायद्यातील रिटर्न्स मध्ये सतत होणाऱ्या बदलांमुळे व्यथित झाले असुन हा भार त्यांच्या सहनशक्तीच्या बाहेर गेला असुन जीएसटी रिटर्न्स मध्ये बिलाप्रमाणे खरेदी,विक्री परिशिष्ट आणि कराचा भरणा पुर्वीसारखेच महिना संपल्यावर एका निर्दिष्ट तारखेला भरावे व तसेच आयकर रिटर्न्स भरण्यासाठीचे फाॅर्म वर्षाच्या सुरूवातीला एकदाच देणे आवश्यक असल्याची मागणी यावेळी कर सल्लागार संघटनेकडुन करण्यात आली.
तसेच सर्व व्यापारी,उद्योजक हे आपल्या व्यापार करत असताना त्यामधील खरेदी-विक्री, हिशोब,कर कायदे,विविध पत्रके यांची पूर्तता ऑनलाईन करण्यासंदर्भातील वारंवार होणाऱ्या बदलांमुळे हैराण झाले आहेत.तसेच कर कायद्यातील जाचक तरतुदीनुसार विविध पूर्तता करताना व्यापारी वर्गाला दमछाक होते,अशी व्यथा व्यापारी संघटनेकडुन नंदकुमार गुजर यांनी मांडली.
चुक झाली तर जीएसटी रिटर्न दुरुस्त करता येत नाही,कर कायद्यात पूर्व सुचना न देता सतत काही ना काही नवीन बदल,फाॅर्म मधील बदल मागील तारखेपासुन केले जात असल्याने त्याचा मागोवा ठेवावा लागत असल्याचे भरत शहा यांनी सांगितले.
आयकर,टीडीएस,जीएसटीची स्वतः दाखल केलेली आणि पुरवठादार व ग्राहक यांनी दाखल केलेल्या माहितीत फरक असेल तर ज्यांनी चुक केलेली आहे,त्यांना नोटीस न देता निरागस खरेदीदार व्यापाऱ्यांना नोटीसा येणे,ई-वे बिल दुरुस्त न होणे,इनपुट टॅक्स क्रेडीट रोखणे,नोंदणी रद्द करणे,कॅश लेजर,क्रेडीट
लेजर,अव्हेलेबल,युटीलाईज्ड क्रेडीट संकल्पना अजुनही नक्की समजत नाही, व्यापाऱ्यांनी व्यापार करायचा की कर कायद्यातील वरील अशा क्लिष्ट तरतुदींनुसार पूर्तता करायची,याचा व्यापाऱ्यांना त्रास होत आहे.त्यामुळे कर कायद्यात सुसह्य सुधारणा कराव्यात,अशी एकमुखी मागणी यावेळी करण्यात आली.मा.तहसीलदार मेटकरी यांनी दोन्ही संघटनेचे म्हणणे ऐकून घेऊन निवेदन स्वीकारले व हे निवेदन केंद्रीय अर्थ मंत्री कार्यालयात पाठवू तसेच आपल्या अडचणी सोडविण्यासाठी प्रयत्न करु,असे आश्वासन त्यांनी दिले.
यावेळी इंदापूर कर सल्लागार संघटनेतील शिवाजी चवाण, धीरज गांधी,शंकर गायकवाड,संजय राऊत तर व्यापारी संघटनेतील नरेंद्रकुमार गांधी,दत्तात्रय बोत्रे,संजय बानकर,मुकुंद शहा,पृथ्वीराज पाटील,संदीप वाशिंबेकर,धीरज कासार,नितिन शहा,इत्यादी व्यापारी उपस्थित होते.
टिप्पण्या